政情：永旺開高檔超市賣貴貨
隨住港人愈嚟愈追求優質生活，所以伴隨住大家成長嘅日資百貨吉之島都要變格喇。永旺首間高檔精品超市尋日正式開幕，主打貨品就係有特色同貴，但原來超市入面啲貨只有三成係採購自日本，其他都係來自歐美等地。係咪因為日本地震後影響到採購比重？不過據講話佢哋旗下超市一直都賣世界各地貨品，務求畀多啲選擇消費者喎！
公司董事總經理林文鈿就介紹，因應依家咁多人鍾意得閒同三五知己摸吓酒杯底，所以超市入面有個紅酒專區。飲開紅酒嘅人都知，飲之前要適當地將紅酒「air」吓，所以佢哋入咗一啲好特別嘅紅酒杯，斟酒落去四分鐘就等於「呼吸」咗兩個鐘咁，最啱咩都講快嘅港人。另外仲有日本進口嘅黑豚肉，每一千克就要賣八百幾蚊，而且目前淨係得呢間超市有得賣，認真矜貴。
林文鈿介紹超市入面設有紅酒專區。