政情：賭王捐300萬助濠中育才

賭王何鴻燊近排甚少公開露面，但無損佢做善事嘅愛心。最近賭王向佢出任永遠榮譽董事長嘅濠江中學捐資三百萬澳門幣，用於該校附屬英才學校擴建校舍及增購設施之用，逐步實現幼稚園至高中一條龍嘅辦學體系。

澳門博彩行政總裁蘇樹輝尋日代表賭王出席支票捐贈儀式，由該校校長尤端陽接受。賭王好支持學校「愛國愛澳」嘅宗旨，希望透過捐建教學設施，致力為澳人治澳培育優才。佢更加寄語年輕人要好好讀書，因為學問唔止個人終身受用，更能惠澤社群。

早前濠中啱啱慶祝建校七十九周年，並舉行新一屆校董會職聯歡活動，一眾港澳名人慷慨捐輸。除咗賭王之外，仲有新世界集團主席鄭裕彤、長江製衣創辦人陳瑞球等都有踴躍捐輸。

開辦甫一年嘅英才學校，預計擴建工程三年內完成，佢哋受到咁多富豪名人嘅支持，想辦成一間質素一流嘅一條龍名校，實冇難度啦！