政情：搞搞政：唐唐行屍走肉遮醜

夕陽政府嘅民望低處未算低，淨係識做政府化妝術企圖將醜聞淡化，最新例子就係掩護疑似特首候選人、政務司司長唐唐涉嫌運用公共資源製作競選網站。話說政府新聞處喺前晚八點五十九分發表聲明，不點名指涉事嘅唐唐新聞秘書同另一名非公務員合約僱員冇違規，由於茲事體大，尋日行政會議開會，眾傳媒直接向唐唐問個究竟，但係佢無論開會前後都好似借咗聾耳陳隻耳咁，問乜嘢都當完全聽唔到。

及至同日下午，夕陽政府又突然將好多惹火事件，包括蘇錦樑署任商務及經濟發展局局長三個月後正式坐正，以及立法會出缺替補機制修訂等一次過拎晒出嚟，令到傳媒疲於奔命。其中不得不提嘅係政制及內地事務局局長「林公公」林瑞麟尋日下晝會見傳媒講替補機制安排時，唐唐咁啱得咁蹺喺佢後面行過，成件事巧合成咁，你話成個政府唔係夾埋幫唐唐掩護醜聞都冇人信喇！