政情：林公公畀人玩禍延建築署長

替補機制鬧得滿城風雨，唔少泛民主派政黨仲呼籲市民喺七一上街反對有關機制，政制及內地事務局局長「林公公」林瑞麟尋日「跪低」，正式向外公布修訂草案嘅內容，但被問到係咪為咗七一降溫時，佢就含混其詞。

始作俑者係「陳監林」

勢估唔到連同政制毫無關係嘅建築署都畀人拉埋落水，我哋尋日收到自稱「建築署初級員工」嘅電郵，話收到署長劉賴筱韞轉發嘅電郵，提醒大家唔好批評政制及內地事務局局長林瑞麟，嗰位員工認為係壓制言論自由。

我哋睇真啲封電郵，原來始作俑者係「陳監林」，佢話日前食飯聽到有建築署員工批評林瑞麟，話替補機制荒謬，違反法理基礎、人權，出賣香港。佢哋又話林瑞麟係中央派駐香港嘅東廠太監。

「陳監林」最後講到出面咁話，林瑞麟長期以來願意委曲求全，配合民建聯政策，實在不應該被委屈，請署長督促下屬，不應私下議論政事。

呢單嘢擺明係立法會議員陳鑑林畀人惡搞，借佢嚟話林瑞麟，仲要玩埋劉賴筱韞，一石三鳥。若果林公公知道畀人擺咗上枱，仲要連累埋其他部門嘅同事畀人玩嘅話，佢會點諗呢？

我哋同陳鑑林講起，佢一笑置之，話呢啲行為不可取，若果對社會上有咩問題，應該正正當當提意見，唔好搞啲偏門嘢，詆毀人咁話。

建築署發言人承認，署長較早前接獲一封來自公眾嘅電郵，並轉發畀該署高層人員，署長並冇作任何指示，因此唔存在干預言論自由嘅問題。