短打長擊:研究當幌子 報喜不報憂

夕陽政府施政,好多嘢令人莫名其妙。好似身為勞工及福利局局長嘅張建宗,對各界要求推行全民退休保障計劃嘅呼聲充耳不聞,連立法會聽證會都缺席,當民意冇到;又如林公公力推替補機制,可以完全不經諮詢便為所欲為,一味厚顏無恥自把自為,不理民間任何聲音。這樣除了失信於民,更是自欺欺人。

過去三年,政府十二個決策局使咗兩億公帑,完成了百多項顧問研究。本來,決策前做研究正常之至,問題係呢個政府鬼鬼祟祟,該研究的又唔做,做了研究的竟有三成從來沒有公開或對外完整披露。

用公帑支付嘅研究,政府竟不准百姓過目,這不荒謬嗎?如此選擇性公布研究結果,與黑箱作業有何分別?有利政府的顧問研究就公布,反之則收埋,報喜不報憂。咁嘅研究,無視真正困難缺漏,過億研究費,根本就係倒錢落海。

政府做了研究又秘而不宣,換言之即係刻意收埋一啲「唔見得光」嘅嘢,把顧問研究當做幌子。如此,不但避過民意責難,輿論聲討,問責高官更覺得「自己做好份工」。目之所見,眼之所視,天正藍,水正清,草正綠,哪裏會有京官所提點的憂患意識?

香港號稱國際大都會,崇尚多元文化主義。然而,正如有外國政治家指出,沒有哪一種文化是完美的,或代表了最美好的生活,因此所有的文化都可以從其他文化的對話中受益。可見多元文化主義要求所有文化保持開放,自我批評;現在港府卻自我作繭,自封生路。

洪戈