李小龍館爛尾 官僚懶散累事

「咤！」已故武打巨星李小龍擅長耍雙節棍，出手又快又準，可惜港府半招都學唔到，做事總係拖泥帶水，即使有心想實行，又成日甩甩漏漏衰收尾。呢，當局咪話搞李小龍紀念館嘅，計劃拖咗兩年幾，又爛尾收場嘞。叮！

按原來計劃，李小龍紀念館設於九龍塘金巴倫道，亦即係李小龍嘅故居，依家係一間時鐘酒店。○九年初業主答應捐出物業時，李小龍迷寄望甚殷，以為唐山大兄從此喺香港落地生根，精武英雄又可以再綻放光芒。點知計劃臨門一腳被扑低，原因係業主要求喺故居加建三層地庫，港府企硬還價一層，令談判觸礁。

計太一叮話齋，李小龍館拖拖拉拉搞足兩年有多，呢段期間樓市係咁升，展館仲位處九龍塘黃金地段，計劃驟生變數，搞到最終告吹，有乜出奇吖？要怪就怪官僚懶散作風累事。展館爛尾嘅消息一出，李小龍迷梗係大失所望啦，大費周章一輪，最後得個吉，李三腳泉下有知都激到彈起啦。更加有陰謀論揣測，港府對建館向來諸多推搪，今次又臨尾甩轆，係咪存心耍太極忽悠港人呀？

嗱，港府究竟係咪耍太極，要問佢自己至知，不過有一件事就好清楚，就係港府白白錯失一次為本港旅遊業增闢地標性景點嘅機會。大家都知啦，李小龍當年一句「中國人唔係東亞病夫」震懾全球，魅力至今歷久不衰，若然可以將龍的故居復修成展館咯喎，香港旅遊業就可以多一個賣點啦，唔使再被遊客批評睇嚟睇去得嗰幾個景點。

所以話啫，港府真係好鬼失敗，李小龍係「香港之光」，竟然唔識好好運用。環顧全世界，搞旅遊梗係千方百計搬歷史人物出嚟招客㗎啦，好似莫扎特故居、但丁故居諸如此類咁，甚至連《金瓶梅》裏面嘅天下第一淫賊西門慶，都被內地省市視為吸金之寶，爭住認做「西門慶故里」。證明只要肯食腦，大淫棍都可以變旅遊業英雄，邊有人好似港府咁笨，捉到鹿都唔識脫角！

所以咯喎，港產官僚實在有必要拎番個大腦出嚟，認真諗諗點樣令李小龍紀念館敗部復活。譬如話，加建地庫唔得啫，有冇其他方法補救呢？可唔可以向業主動之以情呀？李小龍都講過啦，以無法為有法吖嘛，政策講靈活變通，官員無理由一句無法達成共識，咁就關人個關o架。嗱嗱嗱，懶散官僚唔好話已經冇嘢可以做呀，太一叮讀得書少，你唔好呃我！