政情：搞搞政：莎姐出戰新西撼田二少？

喺上屆立法會地區直選全軍覆沒嘅富貴黨，下屆點樣翻身係焦點之一。但黨內可以喺直選擔大旗嘅，數嚟數去只得榮譽主席田北俊、副主席周梁淑怡。田少會喺新界東捲土重來係人都知，但莎姐會唔會喺新界西「再來一次」？

政圈都知莎姐相當享受湊孫嘅悠閒生活，加上早排仲喺電台節目表明，富貴黨唔會去新界西同退黨嘅田北辰對撼，出山機會微乎其微。但近排黨內部有人提出，既然田二少已入咗新民黨做副主席，兩黨即使唔係敵人，都唔可以叫做好朋友，所以唔少黨友質疑，富貴黨有乜理由要讓路畀新民黨，加上該黨民調顯示，莎姐支持度唔錯，唔係冇機會當選，但問題係佢似乎唔想出山啫。

換言之，若果勸掂莎姐出山嘅話，就等於富貴黨同田二少全面反面嘞！咁就要睇下後續係點囉！

除咗保住黨內現有三個功能組別外，佢哋亦希望可以搶番退黨另組經濟動力嘅三個功能組別席位，富貴黨現時嘅判算係，紡織及製衣界係最有機會奪回嘅議席，事關富貴黨喺呢個界別有先天優勢，而且業界大部分都係自己友喎！