政情：中銀人壽慳家籌廣告費
今年首季中銀人壽成績斐然，做咗市場一哥嘅中銀人壽執行總裁蔡中虎就話舊年佢哋嘅廣告策略獲得好好口碑，成績咁好話唔定同打造咗鮮明嘅品牌形象有關，所以嚟緊佢哋會推出新一輯廣告，希望承接氣勢。
其實舊年個廣告背後都有段古，話說本來中銀人壽冇預到呢筆廣告嘅「筆直」，所以蔡中虎就要諗盡辦法撲水，例如抽起一啲客戶唔多受落嘅小禮品，慳慳埋埋先湊夠廣告費。不過話就話慳慳埋埋，其實個廣告都落足本㗎，據聞費用達六位數字。
不過，中銀人壽有好成績，又點可以唔提佢哋嘅人民幣保單呢？蔡中虎話今年人保佔咗佢哋約八成嘅新做保單保費，帶動首季嘅總標準保費達二十二億五千萬元，市佔率百分之二十點八。