政情:棠哥七.一前暗插煲呔曾

嚟緊嘅七.一遊行,民陣首次以「曾蔭權下台」為遊行嘅主題之一,泛民主派自然磨拳擦掌,準備同煲呔曾「玩鋪勁」,理應明撐夕陽政府嘅建制派中人,亦對政府愈睇愈唔順眼,其中曾因最低工資立法同煲呔曾撐到行嘅工聯會,更由身兼行政會議成員嘅會長鄭耀棠領銜主演,公開係七.一前夕落煲呔曾面,宣布該會在房屋問題上支持「增建公屋,復建居屋」。

話說棠哥尋日下晝舉行記者會,本來只係公布搞個香港回歸十四周年嘉年華會,殊不知講講下,就自行騎劫咗記者會嘅主題,喺記者會後口風一轉,向夕陽政府嘅房屋問題「發炮」,仲預告工聯會嘅房屋研究報告即將出爐。

佢放風話,工聯會已研究咗房屋政策成半年,力主政府要「增建公屋兩年上樓,復建居屋安居樂業」,而且佢哋喺研究時仲發現「劏房」盛行,連美孚新邨都出現「劏房」咁話。佢仲話工聯會議員最近兩個月同煲呔曾「哦哦」嘅都係房屋問題,而且佢亦都指示工聯會議員要盡快向立法會抽籤作動議辯論討論房屋問題。

不過,政府借咗聾耳陳隻耳,懶聽民意,到時建制派真係群起搞革命,政府都係自己攞嚟衰,與人無尤喇!

「Money18免費即秒股票報價網站」現推出8升級功能,財經資訊,實時實發!