政情：恒生高人谷企業銀行業務

身高六呎二吋嘅Thomas徐振文係恒生銀行嘅「高人」兼籃球隊中堅分子，佢四月初接任企業銀行業務總監，坦言企業銀行舊年稅前溢利升百分之三十八，今次接任有啲挑戰，佢承諾會急起直追，維持高增長。

Thomas以往擔任商業理財業務主管，對住超過十萬個中小型、業務性質簡單嘅企業客戶，依家轉戰企業銀行真係截然不同，客戶業務廣泛，當中包括紅籌同藍籌企業，貸款結構複雜兼銀碼大！而喺正式接任前，前任總監吳源田，同埋上司陳力生過咗唔少料畀佢，佢又透過蛇宴同客戶建立關係。

佢腦入面已經有一套搞好企業銀行業務嘅計劃，好似增加系統資源投資，盡量將工作程序自動化。另外，佢會盡快落實企業銀行銷售獎勵計劃。又會透過新近落實嘅職員交換計劃，安排中港兩地嘅同事互調工作，以後處理紅籌企業業務時，會更加得心應手。