政情：史美倫劈炮爆被呃內幕

身兼行政會議成員嘅史美倫，上星期以職務太多為由，劈炮唔撈大學教育資助委員會主席，佢尋日喺宣布請辭後首次會見記者，就提到教資會佔佢最多工作時間，既要走訪八大管理層，又要晚晚睇文件，所以早排決定請辭專注其他公私職喎。講到任職四年半以嚟嘅表現，史美倫就話當中部分政策都「多多少少有被誤解」喎！

李國章 當初話一年開三次會

既然咁忙，當初點解仲要接呢份job？佢講笑話，當初入教資會時畀時任教育局局長李國章告知「一年開三次會」，但冇被告知「一次會開四日」；為咗了解各大學嘅情況，又要探訪學校，喺過去四年已經探訪咗三十九次，每次起碼要花半日時間咁話。入職先發現工作量愈來愈大，搞到佢唔得閒做其他嘢。

聽佢咁講，似乎係暗示畀李國章呃咗喎！對於外界揣測佢劈炮係諗住想接港交所主席或港大校長嘅職位，佢就話暫時未有空間接受其他公私職，退出教資會後就會專注喺滙豐控股非執行董事、全國人大代表等職務。

任職教資會委員兩年嘅鄭維新將會喺九月接任，點睇佢嘅接任人呢？佢就話對方任多間大學校董，相信接手冇問題。

喺佢會見傳媒期間，大約十個學聯嘅學生代表就到教資會踩場，抗議教資會藉回撥學額機制對部分大學削資，例如理工大學失去上繳嘅一百零九個學額，浸會大學就失去二十幾個，學聯要求教資會取消回撥機制。最後學生代表向史美倫遞信後離去。