限制孕婦一刀切 庸官添煩又添亂

如果評選最不受歡迎嘅港府高官，食衞局局長周一嶽肯定榜上有名，佢十足十係過街老鼠，去到邊畀人鬧到邊。

嗱，尋日周一嶽上去電台為明年減收內地孕婦政策解畫，唔少團體趕嚟踩場，仲有幾名內地孕婦跪地攔截佢嘅座駕，要求同佢對話，點知佢居然視而不見，無動於衷。有請願者贈予「王八蛋」嘅稱號，真係實至名歸。

點解呢班內地孕婦咁激動？咪就係港府一刀切限制內地孕婦來港產子惹禍囉。本來呢，當局為咗避免醫院產科爆煲，限制內地孕婦來港分娩，咁都無可厚非嘅，弊就弊在周一嶽做嘢貪方便，唔理三七二十一，連港人內地配偶亦統統限之哉，咁就出事啦。正如關注團體話齋，港人內地配偶應該分別對待，唔能夠一刀切將佢哋拒諸門外，因為佢哋嘅仔女話晒同香港有關係。

可惜吖，你有你講，佢有佢扮聾，對關注團體及港人內地配偶嘅訴求，周一嶽一於少理。佢話喎，理解及同情中港家庭嘅情況，但現時政策及法例都無法調整；仲話中港家庭問題複雜，未必只係醫療問題，亦涉及婚姻如何證明。叮，講咁多廢話，無非都係為咗卸膊啫！

其實，所謂政策及法例無法調整，根本九唔搭八，如果周一嶽肯做嘢，調整政策及法律容乜易吖。至於話涉及婚姻如何證明，更加不知所謂，唔通佢唔知內地有結婚證書呢樣嘢嘅咩？懶人多大話，周一嶽勝在講大話唔眨眼，真係服咗佢。唉，依家香港已經夠亂o架喇，佢仲喺度添煩添亂，製造爭拗，都唔知佢究竟有乜居心！

話時話，關注團體講得冇錯㗎，既然港人內地子女有權來港團聚，港人內地配偶來港分娩都好合理啫，點解港府唔將佢哋同其他內地孕婦分開處理呢？周一嶽都識講啦，佢哋嘅子女遲早可以來港定居，既然係咁，港府又何必故意留難佢哋呢？呢，連行政會議成員都話喇，港人內地配偶懷有嘅嬰兒係香港居民嘅子女，喺醫療資源許可嘅情況下，應優先照顧佢哋，反正咁做對本港整體人口政策唔會有太大影響。

聽到未吖，周一嶽，你懶就懶喇，仲要諸多藉口，簡直豈有此理。嗱，咪話太一叮唔提醒你，七一就快到喇，請好自為之，千祈唔好再逼人上街吖，叮！