政情：搞搞政：一日走兩場發叔捱到病

鄉議局尋日有兩場大龍鳳，先係上午十二點半招呼立法會發展事務委員會成員落鄉視察，其次係下晝四點鐘，四個北區鄉委會舉行就職禮，鄉議局主席劉皇發同副主席張學明唔夠三個鐘之內連趕兩場，忙到有氣冇碇抖，發叔更因為導賞呢個艱巨工作病咗。

尋日又熱又曬，發叔卻一身整齊西裝，率領鄉議局高層帶兩名議員巡察僭建村屋，行咗兩個幾鐘頭，人人都身水身汗，發叔仲要應付傳媒嘅採訪，捱到三點鐘，發叔同學明又由元朗趕到沙田石門，出席就職典禮，唔知係咪體力透支，定係連日僭建風暴太多事幹，返到大本營嘅發叔竟然病倒，只係現身十分鐘，食咗一舊燒肉就離開。知情人話，發叔捱到病咗！

講開北區四個鄉事委員會包括上水、粉嶺、沙頭角與打鼓嶺，尋日舉辦聯合就職典禮，以示團結。鄉議局好欣賞呢個做法，破天荒同意係鄉議局新大樓開幕前，喺入面嘅大劇院筵開一百五十席盆菜宴，呢個排場真係可一不可再，事關劇院今後只用作表演之用。