政情：預測天氣唔夠準 岑智明有排煩
夏季到，本港天氣亦進入瞬息萬變嘅時候，過去因預報天氣失準備受批評嘅天文台，早前又迎來新台長，尋日上任兩個多月嘅天文台新台長岑智明出席一個電台節目，大談預測天氣嘅問題，講到新工作嘅挑戰時，佢就明言，市民覺得佢哋預報天氣嘅準確度較實際低喎！
點解咁講？岑智明話，佢哋依家預測天氣嘅準確度有九成，但佢哋收集嘅調查結果顯示，市民認為預報天氣嘅準確度只得七至八成，同佢哋嘅發現有明顯落差，咁點解決呢？岑台長話，呢個係好事，令到天文台有進一步提升嘅空間。
雖然佢講得好大方，但市民嘅睇法卻不能忽視，所以天文台正研究喺南海安裝監察儀，加強觀察南海氣象。睇嚟，新台長嚟緊仲有排煩。