政情：《福布斯》搞錯鄭志剛阿爸

城中唔少名人都係靚衣架，《福布斯》（Forbes）中文版新鮮出爐嘅「全球時尚界25華人」排行榜，有好多香港人熟識嘅臉孔，包括新世界集團第三代接班人鄭志剛（Adrian）、I.T服飾董事長沈嘉偉、百麗國際首席執行官盛百椒，甫躋身上市公司行列嘅米蘭站主席姚君達亦榜上有名。

今次排行榜唔單止要識得穿衣打扮咁簡單，亦無具體分數標準去評選，全憑同全球時尚領域專業人士交流心得總結而成。Adrian率領嘅周大福珠寶，去年推出嘅中國古典設計系列揚威巴黎，正朝着高檔市場邁進，又籌備緊上市，當然係時尚界不可忽視嘅人物啦。不過，《福布斯》忙中有亂，竟然話Adrian係鄭裕彤之子，其實彤叔係Adrian爺爺，鄭家純先至係Adrian嘅父親。

而前藝人邱淑貞老公沈嘉偉，《福布斯》話佢娶咗位靚老婆後，身家一路看漲，老婆唔止身兼I.T嘅形象代言人，又搵埋老友張曼玉做形象創作總監，提高I.T知名度。