政情：通識科反面教材 林瑞麟做人辦

立法會將於下月十三日恢復二讀立法會議員替補機制法案，泛民議員對政制及內地事務局大石壓死蟹咁處理重要條例手法好不滿，日前更齊齊退席表示抗議，尋日前問責局長王永平又開行火，炮轟政府處理呢條條例嘅手法，直指政府自知理虧，所以才想「快刀斬亂麻」，佢仲好怒氣話，整件事勢成為「全世界最佳通識科反面教材」，佢雖然冇點名，但政制及內地事務局局長林瑞麟肯定成為反面教材人辦。

王永平轟替補機制唔合理

林公公一手一腳負責呢條條例，但佢一開始已閂定公眾諮詢道門，仲急急定下今個立法年度通過替補機制草案嘅時間，即使立法會泛民主派一再炮轟政府「施政霸道」，佢都當聽唔到，一味只想早上岸、早甩身。

退出政府後一再高調批評政府施政嘅王永平尋日出席電台節目時，都講到替補機制好唔合理，佢話替補機制嘅構思完全唔合理，違反基本邏輯，並舉例：「其他地方係名單第二個候選人補上，大部分係補選，政府就唔跟同一名單。」佢認為呢個改變已經違反咗機制。而且，佢預告替補機制一旦通過，一定會有好大後遺症：「替補名單班人唔知會唔會打小人，引誘人做不道德交易。」

講到政府只求開快車通過條例時，王永平直言咁樣同「盲婚啞嫁」冇乜分別？立法會審議法案時間不足，市民嘅了解同討論都唔充分，最終只會搞到香港選舉制度混亂。王永平嘅重炮，林公公肯定聽唔入耳，不過，政府呢鋪硬闖立法會，仲可能面對好多變數，早前已經有六十幾名學者發表聯署聲明，大律師公會同法律界又提出咗反對意見，家吓連前高官都出嚟攔路，林公公呢條闖關路真係唔易行呀！