桑拿體館焗到暈 官僚卸膊害市民

真係好熱！愈諗愈慶！三十年來最熱嘅六月，氣溫最高上到攝氏三十四點五度，之但係市民仲要焗住桑拿嚟打波，何止焗到暈，簡直離譜到暈！叮！

太一叮講嘅「球場桑拿室」，就係公共體育館。唔講都唔知，康文署轄下共有八十九間體育館，其中八間嘅主場館竟然無空調設施，僅靠出入口通風，異常翳焗，市民喺裏面打波同乾蒸桑拿無乜分別。若然場館係打康樂棋都算吖，但事實係主要打籃球、排球或者羽毛球等體力型運動場地，喺咁翳焗嘅環境跑來跑去，姚明落場都分分鐘頂唔順。

八間無空調體育館散布新界同市區，本報記者巡查過其中五間，發現場內氣溫超過三十度，平均濕度為百分之六十八點七。嗱，睇睇恒安同顯徑兩間體育館嘅主場館吖，中午時分熱到成三十三度，同今年最高嘅熱爆紀錄差唔多。

最離譜嘅係，體育館有管理等如冇管理，明知六月熱浪逼人，主場館無冷氣亦無人諗計補救。好似顯徑體育館咁，明明主場館設有四部掛牆式風扇，但係備而不用變成裝飾品，要人望扇止熱。喂，醫生同體育專家警告，市民喺翳焗環境運動，中暑機會大增，更隨時會導致心臟病發。市民去體育館打波，以為可以增強體質，點知隨時變咗有損健康甚至冇咗條命仔，你話係咪諷刺到暈？

港府窮到只剩下錢，一場東亞運超支都億億聲，一直未為八個主場館安裝冷氣，梗係同財政無關啦，而係官僚卸膊變成靠害市民。康文署早喺○九年已經話會研究加裝空調系統，但係一直得個講字，話要同其他部門研究可行方案喎。官僚交波有如開出鬼影變幻球，真假難分，市民都係唔好抱太大希望嘞。

港產官僚有時真係令人啼笑皆非，搞宣傳及展覽中心拍烏蠅，冷氣超勁但係無人消受，白白嘥料嘥電費，而市民喺體育館打波，汗流浹背氣羅氣喘，反而連風扇都無得用。有女街坊埋怨，唔敢參加喺桑拿體育館舉辦嘅活動：「無冷氣真係太熱太焗，身體差啲都驚會猝死！」

咦，一言驚醒夢中人，本港咪發生過多宗市民喺體育館戰死球場嘅猝死個案嘅，會唔會同被迫焗住桑拿打波有關呢？卸膊官僚唔想變殺人兇手，都係快啲接番個波，速速改善桑拿體育館嘅通風設施啦，叮！