政情：煲呔曾出醜到澳洲

煲呔曾喺香港面對記者窮追猛打時，大多避得就避，有時直情當睇唔見，唔高興仲當場黑面。時被揶揄崇洋嘅煲呔曾近日出訪澳洲，卻對外國媒體來者不拒，但被窒多兩窒就露晒底，繼日前畀澳洲傳媒問到本港嘅房屋問題，問到佢口啞啞大出洋相後，尋日又畀彭博通訊社嘅記者翻舊帳，面懵至極。

冇口齒 死死地氣認衰

煲呔曾喺○七年競選連任特首時，曾誓神劈願咁承諾將利得稅由現時嘅百分之十六點五，減至百分之十五，但喺佢上場至今近四年，喺商界極力催促下，呢張空頭支票仲未兌現。佢日前接受彭博專訪時，冷不提防被對方問及減稅呢個承諾，對方仲喺報道嘅字裏行間寸爆煲呔曾「時日無多」，任內難以帶領本港撼贏早已減稅吸引外資嘅新加坡。正所謂牙齒當金使，咁擺明係剝煲呔曾大牙！

畀人翻舊帳，煲呔曾惟有死死地氣認衰。佢話一直都搵緊機會履行承諾，奈何已錯過○七年嗰個大家都認為可行同合適嘅減稅時機，認為家陣民意已唔支持。

查實當年佢拋出呢個競選承諾時，已被外界狂轟佢向工商界買票、帶頭搞官商勾結，唔少政黨更表態反對，認為推出累進利得稅同花多啲資源扶貧至係上策，社會對減利得稅根本從來冇共識。佢利用民情轉變呢個藉口嚟幫自己開脫，唔合邏輯之餘，更係貫徹佢一向「賴地硬」嘅性格。

彭博記者亦喺報道上，指出本港貧富懸殊日益嚴重，樓價節節上升，煲呔曾上任以嚟民望更屢創新低，仲引述埋學者分析，話若果煲呔曾依家宣布減利得稅，只會進一步令人覺得佢偏袒大財團，寸到佢應一應。煲呔曾出訪澳洲幫唔到自己爭分仲獻醜，根本係自暴其短！