取締劏房懶懶閒 危樓炸彈隨時爆

土瓜灣馬頭圍道「劏房」唐樓變火爐煉獄，一場三級火災釀成四屍五命慘劇，震驚全港，連個天都為之哭泣。有人話，如果場雨落早一日就好啦，慘劇或者唔會發生。可惜吖，歷史從來冇如果，事後講乜都無用。

無錯，有啲嘢做遲咗就係做遲咗，事後做乜都補唔番，同一道理，當局嘅補鑊行動對火海亡魂同災民嚟講，根本就係毫無意義。發展局建議將劏房工程納入小型工程監管制度，而屋宇署就話，會喺今明兩年巡查全港一千幢劏房舊樓同失修樓宇，兼且全面清拆樓宇僭建物喎。

唉，次次都係死人冧樓之後，政府先至急急補鑊，上年土瓜灣同一條街塌樓慘劇係咁，今次奪命火災又係咁。點解特區高官只識做事後孔明，永遠係出咗事搞出人命先至知衰補鑊？唔通高官真係唔見棺材唔流眼淚？

太一叮記得，早前僭建風暴搞到滿城風雨，發展局局長林鄭月娥大大聲講，劏房唔一定違法，亦唔應該完全扼殺。言猶在耳，劏房舊樓就整鋪杰撻撻，奪去四條人命，各位官老爺唔知有冇覺得內疚？試諗諗，若然當局一早全面取締劏房同僭建物，拆晒啲計時炸彈，悲劇又點會發生吖？官不殺伯仁，伯仁因官而死，今次係大火奪命，但亦係官僚害人，叮！

嗱嗱嗱，唔係太一叮對官老爺有成見呀，唔少市民打上電台烽煙節目，都係向當局發出同一種怒吼。有人批評，老區舊樓普遍存在劏房問題，唔單止破壞大廈建築結構，一旦發生火警更加阻礙居民逃生，直斥政府取締不力，令住客生活於危牆之下，簡直係失職。

港產官僚向來有被虐狂病態，唔畀人狂插，都唔會積極做嘢。所以咯喎，太一叮有必要大聲鬧醒港府，人命關天呀，唔該唔好再懶懶閒，有咁快得咁快清除晒啲危樓炸彈！

話時話，當局解決劏房隱患嘅表現的確令人放心不下。就睇巡查執法吖，屋宇署今年四月展開特別行動，目標每年巡查一百五十幢目標大廈。喂喂喂，林局長自己都公開講過啦，本港五十年高齡舊樓，每年約以五百幢嘅速度增加，署方咁查法幾時先至搵得晒啲計時炸彈出嚟？滑稽情況有如龜兔賽跑，拆彈永遠不及裝彈快，劏房危樓梗有一間喺左近。大家話喇，當局龜速拆彈，罔顧人命，係咪抵叮呀！