政情：搞搞政：戲子陳眼淚攻陷林鄭
喺《紅樓夢》裏面有林黛玉為枯謝嘅花兒落淚，香港亦有立法會議員為枉死嘅樹林哭喪，佢就係「戲子陳」陳淑莊嘞。
戲子陳年前先為過瑪利諾修院學校嘅一棵「鬼樹」被斬，當場痛哭落淚；佢尋日喺立法會提出動議，要求當局完善樹林管理制度，開頭嘅發言都好平靜，點知到臨近結尾時，演開話劇嘅戲子陳忽然哽咽，話前日香港發生咗兩宗慘劇，死咗好多人，又話其實啲樹林因為政府管理不善而病死甚至被斬，同樣好可憐，講多兩句仲好似真係有眼淚流出嚟，都唔知應該話佢感情太豐富定係好演技。
答辯嘅發展局局長林鄭月娥一直好口硬，反對另設獨立部門處理樹木問題，後來竟然鬆咗口風，話當局會認真考慮研究訂立樹木法。呢次係林鄭首次明確咁講，唔通係畀戲子陳嘅眼淚攻陷咗？