政情：毓民做主席阿Paul踩場

立法會資訊科技及廣播事務委員會尋日召開特別會議，焦點當然係鬍鬚曾同前資訊科技辦公室總監葛輝等點樣互揭臭史啦，但原來好戲唔止呢一場，因為風水輪流轉，平日最鍾意喺議會搗亂嘅委員會主席黃毓民，今回終於一嘗主持會議之苦。

話說當葛輝回答工聯會議員潘佩璆嘅問題時，潘佩璆插口叫葛輝唔使再講落去，因為佢已全部明白葛輝想講咩，唔使佢再嘥口水。毓民主持公道，話潘佩璆唔應該阻葛輝答問題。就喺呢個時候，旅遊界阿Paul謝偉俊即時寸爆毓民話：「你自己平時都係咁樣，阻住啲官員同議員發言，你唔檢討吓你自己？」

畀阿Paul踩到條尾，毓民即時放下主席保持中立嘅立場，忍唔住鬧阿Paul：「你（謝偉俊）想出風頭，你想玩嘢，你出嚟掃我啲嘢啦！不過，我只會暫停會議，唔會趕你出去。」兩人你一言我一語，結果潘佩璆漁人得利，因為兩人嘅爭拗，最後可多獲一分鐘發言。