政情：整朱古力考起孫奕朗
萬事達卡國際組織香港及澳門總經理孫奕朗（Jeroen van Son）尋日約咗班傳媒聚吓，但地點竟然係灣仔一間專食朱古力嘅舖頭。為乜？原來係一齊落手落腳整朱古力。
Jeroen話今次係第一次整朱古力，預計應該都OK嘅，喺師傅教緊大家步驟嗰陣，佢仲笑笑口話都幾易整喎。點知到整嗰陣，佢就話原來真係幾難，特別係控制朱古力嘅厚薄，只要慢啲手，啲朱古力就即刻變硬，整唔到好靚嘅外形。
佢本身係荷蘭人，嚟香港之前喺澳洲最大信用卡發卡銀行做嘢，之後就轉咗去萬事達卡，仲一家大細搬埋嚟香港住添！佢話香港生活節奏好快、好進取，係體驗亞洲嘅好地方。唔知對佢發展內地業務有冇幫助呢？
孫奕朗話朱古力原來比想像中難搞。