淫媒又造假新聞 子虛烏有真無恥

江山易改,淫賤難移,《蘋果日報》又炮製假新聞,冇錯,係又吖!

本來呢,一件污,兩件穢,百件無所謂,爛果報炮製假新聞早已司空見慣,唔值得大驚小怪,但事關今次影響惡劣,搞到人心惶惶,實在唔可以唔踢爆佢。件事係咁嘅,日前爛果報頭版頭條「獨家報道」,指內地發畀中港牌車輛嘅「檢驗檢疫電子車載卡」具竊聽功能。該報為咗加多幾錢肉緊,仲假戲真做,將一個車載卡交畀城市大學電子工程學系副教授鄭利明檢測,成篇報道言之鑿鑿,聲稱竊聽功能「覆蓋範圍遠至本港」,講到真嘅一樣,唔知畀佢嚇死,知就畀佢笑死。

大家試諗吓,目前約有四萬架中港車輛裝咗車載卡,如果真係好似爛果報所講統統具有竊聽功能,咁豈不是毫無私隱可言?豈不是仲恐怖過白色恐怖?

事實究竟係點嘅呢?深圳有關部門直斥爛果報嘅報道係「子虛烏有」。而本報記者為咗求證,從兩架中港車拆下車載卡,其中一個同樣交畀鄭利明檢測,結果證實無竊聽功能;另一個交畀專業教育學院專家梁秉雄檢測,結論同樣無法竊聽。鄭利明指當日爛果報記者只容許佢打開車載卡嘅盒蓋,根本無法確定記憶體型號及功能,佢惟有憑有限資料判斷「懷疑可以做到竊聽」。點知人哋淨係「懷疑」啫,爛果報就加油添醋,大字標題指「公安加裝偷聽器,中港車全竊聽」。鄭利明畀爛果報跣咗一鑊,惟有透過本報澄清,以正視聽。

咁都得!正如運輸業界人士話齋,爛果報未有確切證據就發布似是而非嘅錯誤訊息,製造混亂,「無中生有到無恥地步」。其實,講到無恥咯喎,不嬲都係壹淫媒嘅最大特色,生安白造、杜撰新聞早就成為家常便飯,例如捏造城中富商生癌、假扮解放軍街頭行乞等,千奇百怪,無所不有。而最經典莫過於當年嘅陳健康事件,爛果報為咗炮製「獨家新聞」,居然花五千元請啱啱死咗老婆及兩名仔女嘅陳健康北上尋歡,左擁右抱,結果惹起全城怒吼,淫賤黎被迫死死氣刊登全版啟事公開道歉。

叮!道歉又點呀,爛蘋果就係爛蘋果,嗰頭道歉,呢頭咪又係繼續作嘢。講起真係好笑,淫賤黎成日叫囂「天滅中共」,但北大人一啲都唔介意,仲對佢好包容添,唔單止助壹淫媒上市,畀廣告佢,連井岡山亦獨沽一味喺爛果報推廣紅色旅遊,最近珠海出版社甚至為淫賤黎塗脂抹粉,幫佢出咗本自傳。不過可惜吖,淫賤黎生性反骨,養極都唔熟,北大人對佢愛護有加,佢就恩將仇報,不斷喺北大人背後插刀,今次爛果報生安白造指公安喺中港車輛裝偷聽器,都算係大整蠱嘞啩!

唉,冇法子喇,有人天生被虐狂,就係鍾意畀人從後面插,你吹得佢哋脹咩,叮!

「Money18免費即秒股票報價網站」現推出8升級功能,財經資訊,實時實發!