政情：搞搞政：謝曼怡焗摑老公周達明

由二十個環保同規劃團體組成嘅政府山關注組，踢爆商務及經濟發展局常任秘書長謝曼怡喺五年前做行政署長嗰陣時，為咗爭取喺添馬艦興建新政府總部，喺報章撰文話明白各界保育政府山建築群嘅訴求，又話任何改動都會先諮詢公眾。言猶在耳，發展局舊年宣布賣政府山起甲級商廈時，保育建議就隻字不提，關注組矛頭直指謝曼怡嘅老公、主力推銷賣山方案嘅發展局常秘周達明。咁即係借老婆摑老公啫！

公共專業聯盟主席黎廣德批評政府違反誠信，冇兌現當年謝曼怡嘅承諾，新方案隻字不提保育建議，而舊年做嘅諮詢，至今仲未公開結果。佢仲批評周達明身為城規會主席，主持審議賣地研究報告嘅會議，會有角色衝突，認為有損公平，更懷疑有違城規會指引，已經透過城規會要求周達明避席，但獲回覆指官員出席會議不會影響其獨立性，堅持由周達明主持會議。佢又話會同律師研究指引，如果真係有違規，唔排除採取法律行動喎！