政情：黃天祐呻忙冇得做龍友
金融界有唔少攝影發燒友，除咗胡經昌外，原來董事學會主席、中遠太平洋董事副總經理黃天祐都係其中一個。
話說早前訪問黃天祐，例牌訪問前要影相，殊不知，佢對攝影師嘅相機非常感興趣，仲閒聊起來，討論鏡頭、相機種類等話題。原來佢以前好鍾意攝影，仲話得閒就買唔同器材返嚟鑽研，但近幾年工作好忙，再冇咁多時間玩相機。
咁又係，佢除咗係中遠太平洋要員，時時要飛去不同地方開會外，公職一大籮，除咗係董事學會主席外，又係幾間公司嘅獨立非執董，亦係港交所上市委員會委員，當然忙得不可開交喇！
近排個市雖然表現麻麻，跌多過升，但公司排隊上市仍陸續有來，聽聞上市委員會近期就要加班，一周開兩次會審批公司上市，除咗周四外，周二都要開埋，但黃天祐仲邊得閒玩相機？