政情：煲呔曾懶理青年哥頓扯火
政府早前又出招，以收緊按揭同推出更多土地，希望藉此壓抑樓價，但合和實業主席「哥頓」胡應湘尋日出席一個政黨嘅工作坊時，講到土地利用問題就忍不住向政府發炮，話社會有聲音唔准填海，又有要求處理環保、保護白海豚等問題，又要成立部門保護樹木，佢就質疑政府係咪應該首先保護人先呢？尤其係保護年輕人，因為佢唔希望啲年輕人要捱二、三十年，都冇自己間屋喎！
哥頓仲寸爆煲呔曾呢個夕陽政府，所以佢冇再寄望煲呔曾餘下任期做到啲乜嘢，反而呼籲下屆特首徹底檢討土地政策，唔單止復建居屋咁簡單，佢又以最近熱爆嘅僭建風暴為例，向政府教路可研究係咪畀丁屋向高空或高密度發展。
