政情：局長淪伴遊鬥擦王光亞

特區政府呢幾日高度戒備，出動大量警力將示威者同國務院港澳辦主任王光亞隔開，全程零接觸，仲勞師動眾，要班問責高官變侍應招呼佢，簡直離晒大譜。

王光亞尋日繼續訪港行程，一早先喺發展局局長林鄭月娥、民政事務局局長曾德成同運輸及房屋局局長Eva鄭汝樺三位局長陪同下，去環球貿易廣場嘅觀景台欣賞維港景色。其後Eva仲陪佢山長水遠入天水圍逛街市，食燒肉、蛋撻同飲汽水，仲睇埋公屋示範單位。

Eva踩線 D姐陪食晏

嗰間餅店嘅店員梁太事後仲向記者踢爆，話Eva早喺上星期已特登嚟到視察環境，仲買咗一打老婆餅返去試食。其實視察環境呢啲小事，Eva大可假手於人，究竟係佢過分上心，定係信唔過下屬？竟然連呢啲咁雞毛蒜皮嘅嘢都做埋。

跟住民政事務總署署長「騰雞美華」陳甘美華同特首辦主任譚志源接力，陪王光亞閃電參觀埋新落成嘅鄉議局大樓；而公務員事務局局長俞宗怡（D姐）同一班常秘亦同佢食晏，當時政務司司長唐唐都在場，唔知關佢乜事？

班問責官員掛住做侍應，就搞到立法會近乎真空。話說立法會尋日朝早總共有四個會議要開，其中研究內地與香港特區家庭事宜小組委員會內，政府只分別派出民政局首席助理秘書長周錦玉，同民政事務總署助理署長傅霞敏出嚟受靶，德成局長、騰雞美華，以至負責人口政策嘅唐唐統統冇影。人民力量嘅議員黃毓民喺會上發難，話班公務員全部答唔中問題，浪費佢時間，又斥班主事嘅問責官員掛住做政治騷。

呢班問責官員每個月納稅人成二十幾三十萬蚊人工，竟然不務正業，仲搞到政府運作癱瘓，唔畀人鬧爆先奇。