官僚庸醫一味拖 產科爆煲病沉疴

俗語話，能醫不自醫，咁庸醫醫自己有乜後果呢？咪唔死醫到死囉。現成例子，內地孕婦來港產子，公立醫院婦產科爆煲，本來已經病情唔輕，再被港產官僚庸醫左搞右搞，藥石亂投，卒之搞到病情不斷擴散，成個醫療體系亂晒大龍。叮！

病情擴散成點呢？即係咁，公立醫院產科人手一直捉襟見肘，醫護人員捱到筋疲力竭嗌晒救命。咁嘅情況下成條生育作業鏈自然病鬼晒啦，唔正常到有港女懷孕六周，竟然搵唔到產科床位生仔，簡直荒謬到極。嗱，現有服務被打亂，計劃中嘅新增服務亦受牽連，將軍澳醫院新增產科計劃就係例子，分分鐘由落藥催生變人工流產。

事情係咁嘅，將軍澳人口四十萬，但係喺本港嘅混帳醫療系統下，竟然分唔到一張分娩床位，無公立醫院產房，孕婦惟有舟車勞頓去到觀塘聯合醫院分娩，穿起羊水上嚟真係急過趕住去投胎㗎，既唔方便又牙煙。本來呢，醫管局打算喺將軍澳醫院開設產科，二○一三年投入服務，之但係咁，凡事落到港產官僚手上例必好事多磨，公院產科醫生反對計劃，要求將呢個懷胎三年嘅大計活生生打掉。

醫護界嘅反對唔係無道理㗎，現時公立醫院產科醫護短缺一成，而且好似染上德國腸出血性大腸桿菌咁長期出血不止。如果再增闢新產房，醫護人手由三個蓋冚六個煲，變三個蓋冚七個煲，分娩服務質素不升反降，醫院同孕婦勢必陷入雙輸局面。

之但係咁，將軍澳居民要求便利生仔乃人之常情，而醫護人員提出反對嘅原因亦言之成理，呢鋪真係公說公有理，婆說婆有理。好嘞，最關鍵角色出場，問題始作俑者食衞局點講呢？佢哋話喎，明年檢討醫療人手，再決定將軍澳醫院幾時開設產科喎。咁咪即係本港又多一件爛尾工程囉！

一句講晒，官僚庸醫一味拖，產科爆煲病沉疴。歸根結柢，產科亂象嘅癥結就係人手問題，但係令人諗極都唔明，港府窮到只有錢，點解都請唔到人？係資源錯配，定係當局管理不善呀？喂，要大肚婆山長水遠跨區生仔，好冇陰功啫，港府官僚當為兒孫積陰德，可唔可以有為啲，積極諗諗計呢？

唉，港府仲成日誇誇其談話要發展醫療產業，醫得好產科崩潰呢個急症先至講啦，庸醫不自醫，點樣醫人呀？叮！