政情：洪丕正變身戶外壁畫師
渣打香港行政總裁阿Ben洪丕正尋日連同近六十位同事，帶住一桶二桶油漆，喺幅牆度髹髹畫畫，唔通佢哋想轉行做戶外壁畫師？非也，其實呢個係渣打「員工義工月」嘅其中一個活動，一班管理層去到心光盲人學校，同視障學生一齊創作戶外壁畫同陶瓷磚牆飾，阿Ben仲親自畫咗隻長頸鹿添。
一班平時坐慣冷氣房嘅「賓架」，要喺三十度高溫下戶外工作，阿Ben髹到大汗疊細汗，睇見都戥佢哋辛苦。但阿Ben話雖然整咗幾個鐘都未整完，仲曬到塊面紅晒，但佢覺得今次活動咁有意義，所以會堅持到完成為止。
睇見阿Ben手牽手咁教啲小朋友上色，髹得相當有姿勢有實際，睇嚟佢都相當專業。但佢講笑咁話，學咗幾個鐘整啲「灰水」（牆壁髹油前嘅工序），但始終搞唔掂，所以得出一個結論：銀行家始終做唔到呢方面嘅專業人士。
洪丕正同一班渣打管理層幫心光盲人學校粉飾外牆。