政情：搞搞政：林公公風騷提建議 點知漏招
過往候選人對因選舉開支申報差一蚊幾毫就要到廉政公署飲咖啡感到極度反感，政府最近終於知衰提出小額誤差豁免建議，建議候選人只可對有關選舉嘅選舉申報書作出一次修訂，而一經提交後即不得撤回或修訂。
政制及內地事務局局長「林公公」林瑞麟尋日喺立法會一個法案委員會講到相關建議時，懶風趣咁打個比喻，揚言候選人本來就選舉申報書應「一箭中的」，依家提出建議係「畀大家再射過」，呼籲大家支持建議。
點知佢唔風騷得幾耐，即時畀多名議員反擊，列舉實例質疑會唔會因有關部門分開兩次通知申報書嘅錯誤，而令候選人有兩次修訂嘅可能。
畀議員捉到疑似「漏招」，林公公只好和稀泥咁應對但求過關，指自己會同廉政公署、選舉事務處等相關部門，了解係咪存在有關個案，仲可能會就此調校一下建議喎！
設計圖片