政情：鬍鬚曾攞嚟衰

負面新聞一籮籮嘅財爺鬍鬚曾，先係派錢派出禍，後又捲入葛輝事件，被指向下屬作政治施壓。偏偏佢唔知衰，日前喺網誌度引用蘋果公司創辦人之一喬布斯嘅名言，自暴其短。但最搞笑嘅係，特首辦竟然尋日罕有咁將佢呢篇「大作」再貼上特首辦facebook「上亞厘畢道」專頁，變相擺佢上枱，製造個黃金機會畀網民鬧多佢一次，都唔知特首辦係想幫佢抑或害佢？

「講就諸葛亮，做就豬一樣」

事緣鬍鬚曾日前喺網誌撰文，同大家一齊「分享」喬布斯其中一句經典名言：「Stay hungry, stay foolish」，意即「求知若渴，虛心若愚」，佢仲叫大家諗吓呢句至理名言嘅含意，睇吓有乜嘢啟示喎。

唔少網民見到鬍鬚曾叫人「stay foolish」，當然㷫到出煙，有網民仲嘲諷佢咁foolish。有網民就批評佢親疏有別，泛民叫佢派錢就唔肯，建制派叫就即刻做，仲搞到亂咁派錢，佢口中嘅「智者之言」，應該係弱智個「智」至啱。另一網民更直言，鬍鬚曾口講叫人「求知若渴，虛心若愚」，但偏偏政府所有政務官都唔明呢句說話，「表現出來的只是倨傲，傲慢的嘴臉……偏偏『講就諸葛亮，做就豬一樣』，堪稱諷刺。」

有網民更幽大家一默，自稱係近期熱爆嘅IT組織、有親建制背景嘅iProA網絡評論員，大「讚」鬍鬚曾有才智，仲話未來日子會繼續盡力唱好政府云云，擺明寸爆捲入葛輝事件、被指背後發功欽點要iProA中標嘅鬍鬚曾。

鬍鬚曾輕輕引用一句「智者之言」就激起萬重浪，惹來網民圍剿，呢個故事正好教訓做乜衰乜嘅鬍鬚曾，唔好亂咁拋書包，同人講智慧，否則只會自取其辱！