新跑道再起爭議　笨政府好事多磨

呢個世界有樣嘢叫「開口中」，有時邪到你唔信。嗱嗱嗱，時來運到如印裔阿星，買六合彩揀號碼噏嗰個開嗰個，自然開心到未派彩已經唱通街攞定彩喇，卒之搞到全城哄動。之但係咁，若然「開口中」命數不幸地應驗在近期衰氣纏身嘅曾蔭權把口，香港人都咪話唔閉翳。

呢，煲呔曾早前咪為咗港珠澳大橋被人以司法覆核煞停而發爛渣嘅，指摘部分政客借環保之名阻撓工程，慨嘆北京同新加坡等地區基建不斷改善，而香港就「好事多磨」。言猶在耳，煲呔曾開口中，港府新鮮熱辣推出諮詢嘅興建赤鱲角機場第三條跑道大計，依家亦同樣面臨環保團體挑戰，醞釀多時嘅計劃分分鐘又變好事多磨。

機管局話，破紀錄斥資一千三百億元興建新跑道，可望為香港未來五十年帶來九千億元經濟效益。不過，喺環保人士眼中，呢項工程唔止係「史上最貴」，仲係史上最「廢」，警告日後嘅飛機廢氣勢將勁到無朋友，令香港藍天消失，呼籲全港一齊反對工程咁話。

港府搞基建坐而論道講多過做，環團反對則坐言起行效率一流，趁尋日「世界環境日」開記者會炮轟機管局假諮詢，仲羅列咗諮詢文件三宗罪，包括對飛機碳排放禍患隻字不提自欺欺人，訛稱對白海豚影響輕微誤導公眾，同埋指大嶼山北同屯門依家已經係污染設施集中營，如果再加新跑道加劇空氣污染，區內六十萬居民健康岌岌可危。佢哋建議優化現有兩條跑道，取替興建新跑道。

太一叮唔係環保專家，難以判斷環保界同機管局誰是誰非，但係有一件事相當清晰，就係跛腳鴨政府已經跛到行唔郁，處處弱勢捱打，施政寸步難行。唉，機場建新跑道爭議四起，隨時重蹈港珠澳大橋覆轍，萬一又拖拖拉拉二十年，拗到天光無定案，本地經濟發展因而受阻，受害嘅始終又係全香港市民o架咋。

當然啦，弱雞港府施政一向好事多磨，今次機場新跑道諮詢又畀煲呔曾開口中，正正因為港府只係識得吹水治港，平時講就天下無敵，做就無心無力。正如兒童天地扑傻瓜遊戲嘅恒常定律，機件失靈嘅笨蛋傻瓜自然成為眾錘之的，梗係被人追住嚟扑㗎啦。所以咯喎，麻煩夕陽港府臨收工做番件好事，吸取港珠澳大橋教訓，機場第三條跑道喺環境保護同環評報告方面唔該做足周詳計劃，減少漏洞，咪再臨尾甩轆、耽誤香港、靠害港人呀！叮！