SUN世代：扶貧建築師　帶隊義務起學校

新一代的建築師，除了起樓賺錢外，還有更大的使命感。新紮建築師王建明運用自己的專業知識，與志同道合的好友組成義工隊，遠赴柬埔寨設計和興建幼稚園，為當地失學貧童帶來曙光。「唔好覺得香港細，就好似乜都做唔到咁，大家要睇遠啲、跳遠啲，一樣可以幫到好多人！」

王建明（Robert）○一年畢業於中文大學建築系，現時在一間建築師樓工作。建築師是人人稱羨的高尚職業，但Robert自言只是打工仔，一樣要為口奔馳。不過，人生除了工作，應該還有更崇高理想，「一直諗，點樣可以用自己嘅專業知識去幫人？」

從學生時代起，Robert已在課餘做義工，服務社會上有需要的人，過程令他體會到弱勢社群常被忽視，「例如一啲復康中心，永遠只可以開喺屋邨偏僻一角，同社會隔絕咁，建築應該與人生活有關，將人同生活連繫起嚟。」

○四年，他獲柏立基爵士信託基金獎學金及英國倫敦學院大學獎學金，遂辭掉建築師樓的工作，跑去英國讀書。「我讀嘅課程係有關第三世界嘅城市規劃，認識咗一啲嚟自第三世界嘅同學，佢哋都係國家出錢送佢哋嚟讀書，係國家精英，有好遠大嘅理想，希望學成回國，為國家滅貧。」他覺得很震撼，更堅定了透過建築去幫助人的理念。

獲撥款赴柬埔寨建幼園

○六年，他與志同道合的建築界好友組成「展步築智」義工隊，並獲香港建築師學會青年建築師項目基金十萬元撥款，與一間社企合作設計咖啡店。「呢次係第一次將建築同人拉埋一齊，成個設計既要適合智障人士使用，又要美觀，完成後覺得好鼓舞。」

去年他再獲該基金撥款十萬元，遂再接再厲，與一班義工到柬埔寨貢布市，與當地志願機構一起設計及興建一所幼稚園。「當地小朋友都要落田做嘢，好少機會讀幼稚園，到佢哋升小學，好多時會因為跟唔上而輟學。起幼稚園，就係希望畀到佢哋一個上學機會。」

過程中，他最難忘是與一班天真爛漫的小朋友相處，還一起製作工藝品和印掌畫。「啲小朋友好開心，佢哋最開心係起好學校之後，見到自己做嘅勞作、畫作，放大成為校內裝飾同壁畫，感覺自己都有份參與起學校！」他計劃未來到印度、尼泊爾等地興建學校，為更多兒童帶來就學機會。

不說不知，如果Robert當初沒有選擇入讀建築系，今天或許他是一位社工。「一直好喜歡幫人，就算依家成為建築師，都冇放棄過幫人嘅想法。只要好好運用本港嘅資源同優勢，一樣可以幫到好多人！」

Robert's Profile

家庭：已婚

現職：建築師、「展步築智」義工隊創辦人

學歷：中文大學建築碩士、英國倫敦學院大學科學碩士（城市發展規劃）

專業資格：香港註冊建築師、香港建築師學會會員、英國皇家建築師學會會員、香港綠色建築議會綠建專才