政情：搞搞政：黃毓民區選同KK拗手瓜
舊年政改方案獲得通過，泛民主派嘅議員因立場迥異而四分五裂，「人民力量」兩名立法會議員黃毓民同「大舊」陳偉業早就講明，會喺嚟緊十一月區議會選舉狙擊被佢哋視為「民主叛徒」嘅白鴿黨同民協。
毓民喺元州邨嘅辦事處尋日正式開幕，被問到係唔係真係狙擊民協立法會議員KK馮檢基，即係雙方會拗手瓜喇，但毓民就笑笑口咁話，對方依家都未選定區，要狙擊都無從入手喎。不過，人民力量成員符偉樂就透露，佢哋喺深水埗各區都會擺人，即使喺民協票倉嘅南山選區亦唔會放棄，等民協候選人唔好咁輕鬆喎。咁即係全面狙擊民協喇！
另外，「選民力量」代表人物星屑醫生歐陽英傑尋日亦透露，會派人去港島狙擊白鴿黨班大佬，好似副主席單仲偕、立法會議員甘乃威、中委馮煒光等都會有人招呼，重申相信可以畀到選民多一個選擇咁話。
設計圖片