政情：梁亮勝獻客家心會所免租送裝修
由嚟自六個大城巿嘅香港客家人組成嘅香港廣東客屬社團聯合總會喺十七號舉行首屆就職典禮，尋日佢哋嘅會所仲舉行開幕儀式。佔地七千呎嘅總會會所，位於主席梁亮勝喺觀塘嘅商廈頂樓，佢免租三年之餘仲送埋裝修，梁太古爾夫透露裝修費超過百五萬元。
身為客家之子嘅曾智明就兼任副主席同秘書長，佢哋家族嘅金利來仲包起會員嘅紅呔同絲巾添！佢話樂意為鄉里做嘢，尋日仲擔任司儀，同鄉里用客家話溝通。而佢兩個小朋友，就淨係識「食飯」同「瞓覺」兩個詞語，因為佢哋最鍾意關心爺爺曾憲梓食飯未，臨瞓前又會攬實爺爺問瞓覺未？