新民黨副主席田北辰喺屯門嘅辦事處尋日舉行開幕禮，請到新界鄉議局主席劉皇發做嘉賓，但就冇請屯門鄉委會主席何君堯，唔通因為對方係潛在對手所以唔請？田二少解釋，自己一向尊重鄉紳，發叔有足夠分量代表所有鄉委會喎。
身兼鄉議局顧問嘅田二少亦為近日嘅僭建問題獻計，話僭建係全港性問題，並非新界村屋獨有，政府應訂出日期，凡喺呢個日期前興建，而又冇結構危險嘅僭建物就容許繼續存在，但就要補番地價或租金，轉手亦要先拆去僭建物，咁樣先夠公平。呢個建議唔知政府同鄉議局班鄉紳受唔受呢？