政情：黑英寸煲呔扶貧當口號

身為英皇書院校友會會長嘅天文台前台長「黑英」林超英，一直對母校被教育局勒令縮班一事忿忿不平，但自從佢喺上月初代表校友會向申訴專員公署投訴教育局兼學校管理委員會主席行政失當後，就成個月都冇新動靜。大家唔好以為佢漏晒氣喎，原來佢只係去咗外遊，返港後仲第一時間寫blog，又再寸爆政府。

基層小童難入好學校

黑英喺blog度自爆上個月去咗俄羅斯旅行，仲話喺路過倫敦時睇到一篇令佢好感慨嘅報道。佢得知英國嘅教育大臣擔心基層家庭嘅小朋友喺現行收生制度下，難以入到心儀嘅公立學校，所以就提出改革收生制度，規定好學校收生時，優先取錄基層學生，仲建議政府向收取基層學生嘅學校發特別津貼作為鼓勵。而嗰位教育大臣，亦都明白「好學校應該可以擴充，我們需要更多的好學校」嘅道理。

點解佢喺blog度分享呢單新聞，當然係想借英國嘅例子插港府喇！佢喺文中大讚英國教育當局明白壯大好學校嘅需要，反觀香港就反其道而行，不顧家長期望，先係任由直資學校貴族化，後又喺減班浪潮置身事外，所有官立中學不管優劣均要一刀切減班，批評呢個自願縮班政策令基層家庭孩子入好學校嘅名額大幅減少，更搞到社會流動出現倒退。

鬧完教育局，插完局長孫明揚之後，佢仲燒埋煲呔曾嗰疊，鬧港府嘅扶貧政策。佢怒轟政府口中嘅「扶貧」只係一個口號，直言單喺教育呢個範疇，政府不單冇用力，更係向基層家庭落井下石。

本港貧富懸殊日益嚴重，外界狂轟煲呔曾政府扶貧不力，淨係睇吓關愛基金幾乎爛尾，又冇板斧壓抑通脹，就充分反映咗曾班子齋噏，黑英都鬧得冇錯，但唔知曾班子幾時先會識得反省吓？