政情:搞搞政:邱騰華又衰漏申報利益

畀人嘲諷「做乜都衰」嘅環境局局長邱騰華呢期好運滯,輸咗港珠澳大橋環評司法覆核不在話下,尋日仲畀人質疑漏報老婆黃雪兒炒樓賺錢利益,佢簡直係黑氣纏身。

話說黃雪兒透過建益資源有限公司,喺○五年斥資七百六十萬元買咗個豪宅貝沙灣單位,舊年一月以一千零二十三萬元放售,轉吓手賺咗二百六十三萬,而呢間建益資源,邱騰華都做過董事,只不過係九一至九五年嘅事。

根據行政會議成員申報制度,即使層樓唔係高官所有,只要有實質利益都要申報,但邱騰華信誓旦旦話佢十六年來冇涉及建益資源嘅利益或業務,所以冇漏報問題。

話時話,邱騰華細佬邱騰達前年被指喺施政報告提出活化工廈前,買定工廈改建做酒店,今次又被踢爆話老婆炒樓賺錢,正所謂瓜田李下,捲入咁多疑似利益,邱騰華嘅政治敏感度都要提高啲至得嘞!

「Money18免費即秒股票報價網站」現推出8升級功能,財經資訊,實時實發!

設計圖片及對白