政情：嘥錢聯花30萬買毛巾摺扇
尋日同大家講過建仔繼被戲謔為「僭建聯」後，繼而黨主席譚耀宗又被傳媒揭發佢豪花公帑印刷利是封，旋即被譏為「嘥錢聯」，尋日再翻查議員嘅開支紀錄，發現有啲黨友都有呢鋪癮。
例如張學明曾喺今年花咗成萬銀，喺三千二百架巴士上賣長達七秒嘅新春廣告，又曾一口氣訂造四百個有佢嘜頭嘅易拉架，務求梗有一個喺左近。咁都唔止，佢仲花咗近十五萬元訂造六萬八千多條印有佢個名嘅毛巾。佢早前因捲入僭建風暴而搞到一額汗，為咗「一了百了」，佢決定成幢樓拆過再重建，呢六萬八千幾條自家製毛巾，用嚟抹佢嘅一額汗就啱晒。
該黨身兼行會成員嘅劉江華亦曾花約十六萬元，製作二萬五千個建仔摺疊扇派街坊，扇上寫住「做服務如風不息」。佢嘅地區工作係咪如扇所言咁就唔知嘞，但佢派嘢就肯定如風不息嘞！