政情：王征養生靠沙律紅蘿蔔汁
亞視投資者王征自從舊年三月入亞視做「義工」之後，是非未停過，除股權紛爭外，又捲入亞視另一股東蔡衍明同無綫電視嘅官司，認真惹火，連佢都笑稱咁大個人好少見咁多紛擾。不過，佢無論幾時都咁面色紅潤，原來佢有自己一套生活方式。
王征尋日出席亞視一個活動時，自爆保持心境愉快、臉色紅潤嘅養生之道，原來全靠佢保持原始、老式嘅生活習慣。佢話無論夜晚應酬到幾點，佢朝朝六點半就起身，一口氣游露天泳池十個塘，然後食兩盒美國蔬菜沙律加一杯紅蘿蔔汁，咁就去大埔返工喇，仲係第一個返到公司嘅高層添！