政情：黃敏利論盡真皮爭奪戰

環球貿易牙骹戰一向劇力萬鈞，做皮梳化生意嘅敏華主席黃敏利尋日煞有介事話，今年四月歐盟暫時休戰，正式取消對中國皮鞋徵收百分之十六點五高額反傾銷稅，令人均買鞋數量由五對增至六至六點五對，皮鞋零售價料減百分之三十。佢皮鞋專家嘅口脗，差啲以為佢撈過界添！

原來佢想話，以一套「3+2+1」六座位皮製梳化計，要成五隻牛先成事，三座位梳化都至少要一至一隻半，依家皮革價位升至佢入行二十年以來嘅高位，每平方呎要成個半至兩蚊美元，尤其係舊年十二月開始至今年五月，升幅更達雙位數，歸根究柢就係因為皮鞋搶高晒啲皮價。

佢繼續呻家陣鞋商唔單止抬高個價，最可惡仲要伸隻手過嚟搶貨源。皮鞋不嬲都搶咗百分之五十嘅皮革分布比例，梳化同汽車先分得百分之二十同十五左右，依家皮鞋需求當道，即刻要多百分之五至六先收手，梳化都要縮減百分之五至八讓路，所以佢預咗近期皮梳化銷售比例會減啲，不過正所謂「焉知非福」，事關布製梳化嘅毛利率原來仲好過皮梳化。