政情：通天酒業副總掃港奶粉
唔少內地企業嘅駐港員工，好多都話香港太人煙稠密，好有壓迫感，當然亦有唔少人愛上香港啦，包括通天酒業副總裁Leo李恝在內。
Leo由通天酒業喺香港掛牌之日，就喺香港落戶，佢話喺香港生活得唔單只好開心兼「放心」添，事關佢話內地黑心食品無日無之，牛奶裏面有三聚氰胺、打邊爐又有化工合成嘅一滴香、豬肉又有瘦肉精……同屋企人出街食飯成日都要步步為營，左揀右諗，想盡方法搵啲有信譽嘅食肆，但個心都仲係囉囉攣，唔知會唔會食咗啲有問題嘅食物咁。
之不過喺香港就完全冇有怕，事關香港監察嚴謹好多，去邊食乜都咁放心，所以佢可以好安心咁出街食乜都得，每次返回內地屋企時仲會買定啲奶粉帶返去畀仔仔，佢仲話有時過關啲關員見到佢帶奶粉，都對住佢笑，好似好明白佢哋嘅苦況咁。