政情：白鴿轉啄孫公放生鬍鬚曾

財爺鬍鬚曾發表完「史上最廢」預算案後，畀泛民同建制派群起攻之，其中打得最狠嘅白鴿黨更即時向立法會申請動議辯論，務求要成功對鬍鬚曾提出不信任動議。等了又等，黨主席「鐵頭仁」何俊仁終於抽中喺下個月提出動議嘅機會，但據悉佢哋竟然轉軚，放生鬍鬚曾。

白鴿黨當日信誓旦旦咁話要向鬍鬚曾提出不信任動議，更即時派人入紙申請辯論，可惜喺建制派保皇攔截下，未能喺嗰段關鍵時刻抽中動議機會。不過俗語有云，政治一日都嫌長，白鴿黨其後發現，喺佢哋幫市民出頭，炮轟鬍鬚曾之際，黨內民調卻顯示佢哋得嘅支持度竟不升反跌，事關唔少人都誤以為佢哋係不食人間煙火，反對政府嘅派錢建議，所以佢哋其後追打鬍鬚曾嘅力度明顯收晒火，不信任動議自然亦好似八萬五政策咁，不了了之。

課程「僭建」國民教育

發現繼續打擊鬍鬚曾無利可圖，冇理由做蝕本生意㗎！依家鐵頭仁抽中喺下個月提出動議，咁梗係要搵另一個目標人物，仲要係鬧爆之後可以攞分㗎喇！近期最熱爆嘅係邊個官？咪就係近日捲入僭建風暴嘅教育局局長「孫公」孫明揚囉。不過，白鴿黨提出嘅議題並非僭建，聽講佢哋已拍板屆時會提出討論國民教育，辯論吓政府咁做係咪洗腦。

咦！咁離奇？其實政府突然喺冇諮詢下，殺出嚟話要改課程，某程度上係喺通識教育上搞「僭建」，話唔定班議員到時講講吓，都會燒埋落近期被踢爆住宅有僭建物嘅孫公身上。白鴿黨今次轉軚去咬孫公，睇怕最開心嘅係鬍鬚曾。