政情：胡敏珊台灣巡舖食肥咗
前晚喺「張洹．消失的氛圍」藝術展酒會見到胡敏珊，佢透露啱啱喺澳門返港，仲話：「過去考察，可能會喺嗰邊開舖，台灣已經開咗幾間，成日都要飛過去巡舖。」咁有冇艷遇呀？佢話冇，夜晚都返咗酒店。再追問係咪忙到冇時間拍拖時，佢話如果要拍拖會有時間嘅。
佢又話之前到台灣食咗好多美食，肥咗唔少，依家要努力減肥，希望由依家嘅一百零四磅減至九十八磅，所以每晚六點後就唔會進食澱粉質。咁啲男士豈非唔可以約佢晚膳？佢笑住話：「其實佢望住我應該唔使食o架喇。」佢話喜歡有幽默感嘅男士，認為最快樂嘅女人係佢嘅老公可以每日都令佢笑。