政情：搞搞政：林公公司法制裁兇毓民

人民力量嘅議員黃毓民前日喺立會政制事務委員會上，向政制及內地事務局局長「林公公」林瑞麟發炮，力斥政府建議取消立法會補選、改行替補制欠理據，更掟走林公公嘅名牌，成為首位被事務委員會主席逐出議事堂嘅議員。事隔一日，兩個冤家又再度開拖。

話說毓民尋日喺立法會大會上，借機再批評選管會日前公布選舉指引建議規管埋網台節目，係機關算盡，仲揚言自己屆時一定會以身試法，繼續喺網台節目搞事，又再斥替補機制霸王硬上弓，誓言自己要同林公公鍊到底喎。

林公公被挑釁後，即時喺發言時大反擊。佢語重心長咁同毓民講，「上得山多終遇虎」，唔希望成日將「以身試法」掛喺口邊嘅毓民終有一日會受司法制裁。本來已離開議事堂嘅毓民即時入返去同佢駁火，斥林公公恐嚇佢云云，據講林公公事後仲特登叫毓民唔好咁認真添！

其實毓民咁強烈反擊都只係一種姿態，大家睇佢哋開拖時唔好咁認真就真。