政情：和總股東會親自接投訴
尋日輪到散戶人數勁多嘅中銀香港開股東會，唔好以為年長股東就冇火，有一位中年女士，就投訴中銀員工令佢好谷氣。事緣係佢上年年尾去入票，中間出咗好多麻煩過程，佢本來想打電話去投訴，希望銀行畀番個交代，但影都冇個。
中銀香港總裁和廣北好有心機聽呢位女士嘅投訴，話佢了解呢個係善意嘅投訴，仲話一陣間副總裁楊志威會親自同佢跟進番個投訴，一定畀個完整交代喎！
和總答得咁得體，呢位女士條氣應該順番晒，有一個中年男士亦舉手讚中銀，話佢同獅子銀行唔同，獅子「太傲慢」。呢位男士話睇得出中銀一班管理層「確實係誠心誠意為班股東服務」，佢仲話自己用咗一半錢買中銀，嚇到和總即刻叫佢分散投資。
和廣北
和廣北聽完呢位女士嘅投訴後，即刻話幫佢搞掂。