政情：泛民狂插煲呔曾法蠻

政府輸咗港珠澳大橋嘅環評官司，煲呔曾早前喺立法會答問大會同公文袋互罵後，泛民尋日開聯合記招譴責煲呔曾。白鴿黨主席鐵頭仁形容事態嚴重，事關司法覆核要法官批准，所以煲呔曾嘅言論非常不君子，直接效果係攻擊公文袋，間接效果就係攻擊法庭，絕對唔能夠接受。

職工盟李卓人封咗三個「可恥」畀煲呔曾，包括踐踏法治、鬼祟、賊喊捉賊。公民起動何秀蘭唔排除提出譴責動議；公文袋黨魁袋巾傑就叫煲呔曾向法庭同市民道歉。

保護海港協會顧問兼前主席徐嘉慎亦加入戰團，尋日佢舉行「諉過於民、踐踏民權」聲討會，公開呼籲煲呔曾尊重吓自己嘅身份同地位，絕不能輸咗官司就去批評法庭判決，佢建議煲呔曾一係出來澄清糾正，一係就收番言論，唔好搞到政府好似大晒咁，總之煲呔曾應該尊重市民司法覆核權利、尊重法治。

死要面嘅煲呔曾拿拿臨叫下屬喺下午五點幾發聲明，除老調重彈外，臨尾點都要攞番個彩，話對於有議員刻意曲解佢嘅言論深表遺憾。李卓人知悉份聲明內容後再封第四個可恥畀煲呔曾，就係顛倒是非。

泛民同煲呔曾做完大龍鳳後，依家又上演一場肥皂劇，口水多過浪花，唔知噴到幾時先至完。