政情：「署男」蘇錦樑腦殘難坐正

商務及經濟發展局前局長劉吳惠蘭因病辭職至今已有一個半月，之前盛傳有望「廖化作先鋒」，甚至傳聞政府搵唔到人焗住畀佢上位嘅副局長蘇錦樑，但啲風吹嚟吹去，仲吹到亂晒龍，唔知真定假，但唯一肯定嘅係佢至今仍未坐正，仲係做緊署理局長，莫非真係畀中央「彈票」？

敏感度不足 缺政治智慧

有立法會議員認為「署男」蘇錦樑遲遲未能坐正，絕對係事出有因。公民起動議員何秀蘭話，尋日蘇錦樑喺立法會解答「上網學習支援計劃」招標風波時，有人提及被指同風波有關嘅建仔沙田區議員葛珮帆，但曾經係建仔副主席嘅蘇錦樑都冇主動申報自己亦係建仔成員，明顯係政治敏感度不足，未有從卡片風波中吸取教訓。

再講，商界一直反對競爭法，喺議事廳內外都鬧爆做推銷員嘅蘇錦樑，咁啱劉吳惠蘭辭職，班商界議員睇準機會，密謀趁弱雞嘅蘇錦樑冇還擊之力，希望乘機拖死競爭法又或者逼政府主動撤回競爭法。

喺咁劣勢嘅情況下，日前公開表明會聯同各黨派逼政府擱置競爭法嘅新民黨主席葉劉淑儀，尋日都踩多腳批評負責有關法案嘅蘇錦樑，至今連電話都冇打番個畀佢，不論係當佢冇到或後知後覺，都顯示蘇錦樑缺乏政治智慧喎！咁講都有道理，政府喺立法會冇票，蘇錦樑懶到連票都唔拉，唔通佢都想競爭法玩完？

蘇錦樑早個星期已經以署理局長身份，代表香港到美國出席經濟合作及發展組織貿易部長會議，今個星期又會飛去法國出席另一經合組織會議及世界貿易組織非正式部長級會議，再次以替工身份出席，真係失禮人。再聽完啲議員咁鬧佢法，表現咁差，相信大家明白點解蘇錦樑冇運行，惟有繼續做「署男」喇。