政情：吳建民接掌美國百人會
美國百人會名堂響噹噹，想當年本港富豪二代想搞個組織時，都因為避免侵權，將一度構思嘅名「香港青年百人會」改成「百仁基金」。最近美國百人會會長換人，前會長程守宗退下火線，取而代之係華美銀行集團董事及最高執行長吳建民（Dominic）。
Dominic來頭唔細，佢任職嘅華美銀行，係全美國以華裔市場為主嘅商業銀行中規模最大嘅一間，唔單止咁，佢仲做過聯合基金會（United Way）大洛杉磯分會慈善募款主席，並創下最高籌款額紀錄。Dominic話，喺中美關係新時代，百人會作為促進兩國經濟、政治同社會交流嘅橋樑，作用顯得更重要。
百仁基金主席施榮忻回應美國百人會換新會長時話，百仁基金仲要向百人會多多學習，仲唔排除大家有機會碰面同合作㗎！
吳建民上任領導美國百人會。 （資料圖片）