政情：平叔批立會改規則粗疏

立法會早前通過收緊議事規則，賦權立法會所有委員會主席都可驅逐行為不檢嘅議員出會議廳，前高官王永平尋日都話，立法會今次修改議事規則可能「太疏忽」，原因係冇界定清楚乜嘢叫「行為不檢」。

平叔話，若果有議員喺事務委員會上不斷喧嘩又屢勸不止，賦權主席驅逐相關議員離場係可以接受，但今次立法會投票修改議事規則前，竟冇清楚界定「行為不檢」嘅定義，就真係唔多公道，「咩叫『行為不檢』？唔通佢講嘢大聲啲，分貝太高，你就叫佢走？」

有幾次掟嘢前科嘅「長毛」梁國雄同議事規則委員會委員「鼠王芬」梁美芬，尋日亦因為呢個議題喺電台節目上激辯，仲嗌到面紅耳赤。長毛強調係因為到立法會解畫嘅高官成日講廢話，兼政府制度腐敗，佢先要掟嘢表達訴求；鼠王芬就話立法會係建制一部分，對方咁唔滿意大可以唔入議會。雙方懶理同場嘅白鴿黨涂謹申，唇槍舌劍，互相搶咪，搞到主持人多次出面調停，叫兩人冷靜啲。